Poesia inedita, senza titolo di Franco Auci

Poesia inedita, senza titolo di Franco Auci

'Na duminica Cicciu s'arruspigghiau, si lavau

e prima d'iri a Missa rapiu 'u stipu,

ma 'un c'era nenti, mancu un tozzu di pani

o macari un pezzu di calletta.

Suspirau e si nni sciu

e ghiennu nchiesa pinsau: pensa Diu!

Quannu finiu a Missa

pinsau arre a soccu avia a manciari,

vistu chi 'u stipu era vacanti.

Ma addiunu 'un ci arrestu, cunchiuriu.

E ghiu versu 'a trattoria.

'Sta trattoria avia a ciancu du' signuri

chi cucinavanu di Diu.

Infatti sbummicava un ciauru

ch'era 'a fini 'u munnu.

Iddu, pi capiri,

facennulu comu si nenti fussi,

passau dui, tri voti.

E capiu chi 'na signura

stava cucinannu 'u stufatu,

ch'avia a essiri di carni porcu,

mentri l'autra avia fattu 'i gnocculi

e poi l'agghia pistata

e ora stava friennu 'i pisci.

A 'stu puntu Cicciu

si firmau un pocu davanti 'a trattoria,

dunni vinia fora cocchi cosa di sdilliniu.

E pinsau ch'avia a essiri aggrassatu

e chi ci avissi piaciutu calaricci un beddu piattu pasta

e poi, nò broru ch'arristava, abbagnaricci 'u panuzzu.

Allura chiudia l'occhi, rispirava

e si inchia 'a panza di ciauru!

Franco Auci